Numbers 35
A Maka Tanga ne Huriki a Levi
1 aNa tahuna e huriki a Israel ri made na bilane Moab na tabeke mule lokovonga ne Iordan tabukoi na tanga e Ieriko, e BAKOVI DAGI i takia e Moses, 2“O vakuku e huriki a Israel ri gi ru here ranga tanga na tabeke na malala ne ria, ri gi habi ne huriki a Levi ri gi made vona. Ri gi habi tabu ne huriki a Levi a malala tabukoi na tanga nga, ge ne vona a maka sipsip a bulmakau ne ria. 3A tanga nga ne huriki a Levi ri gi made vona. A maka malala tabukoi na tanga nga, ne vona a maka sipsip, a meme, a bulmakau ne ria.4“Ra malala i vona a varili ge tabuli halui a tanga, ge vakatubu na nure na tanga, ge pagitala ge harena na mita i 450. 5Ra tanga i kamumu ge pesi na kurukuruna malala. A maravana na harena tara ge lakea na harena tara, ge 900 mita.
A Tanga ne Vona ni Kapiloho
(Vinara 19:1-13; 20:1-9)
6“Na tanga nga, a tanga i polotara ne vona ni kapiloho. E rei a viri i rabalaki tara turana, ge ha ge kapiloho vona tara tanga nga. Mu habi tabu ne huriki a Levi a tanga ge ravulu va a polona i rua. 7A malala i tahoka a varili kamumu ge tabuli tabukoi na maka tanga nga. A maka tanga ne huriki a Levi, ni gi palupu lobo i ravulu va a polona i polotolu (48). 8Na tahuna mu bole a tanga nga ne huriki a Israel, mu habi ne huriki a Levi ge kupo a tanga na kabu dagi, ge popote na kabu kiroko.”9Lakea e BAKOVI DAGI i takia e Moses ge taki e huriki a Israel, 10“Na tahuna mu tulu polo loboa a naru e Iordan mu dili na robo e Kenan, 11mu vulaki ranga tanga ne vona ni kapiloho. Na tahuna a viri i rabalaki rurua e turana, bara i ha lakea vona tara tanga nga, ge made vonga. 12Ra maka tanga nga, ri gi tabuli manga a tanga ni kapiloho, a turana bakovi i mate i uka ma ge kolia a nimatena bakovi. A bakovi i rabalaki rurua tara turana bara i made kamumu vonga, ge dava a parava na ni vapelekado.
13“Mu vulaki a tanga ge polotara kunana ne vona a tanga ni kapiloho. 14Ge tolu na tabeke na nirikena haro ne Iordan, ge tolu na robo e Kenan. 15Ra tanga nga ri gi pesi manga a tanga ni kapiloho ne huriki a Israel, ne huriki a mosi. E rei a viri i rabalaki rurua tara turana, ge ha lakea vona tara tanga nga, ge kapiloho.
16“Pali a bakovi ge ubi matea a turana na modona aen, ia a bakovi ni rabalaki a viri. Ni gi rabalaki. 17A bakovi ge ubi matea a turana na kedo, ia a bakovi ni rabalaki a viri. Ni gi rabalaki. 18A bakovi ge ubi matea a turana na modona kai, ia a bakovi ni rabalaki a viri. Ni gi rabalaki. 19A turana bakovi i mate kunana, bara i koli. Ge padimatea a bakovi i rabalakia e turana na tahuna i matavisia. 20E rei a viri i marikoi a bakovi tara, lakea i kopea, i boru, i mate, o i padia na maki tara i mate, 21o i dakia i mate, ra bakovi iea ni gi rabalaki, a vuhuna ia a viri ni rabalaki a viri. E turana bakovi i mate ge koli, ge rabalakia na tahuna i matavisia.
22“Pali a viri i uka ma i marikoi e turana, pali i kopea, i boru, i mate, o i voro tavula a maki, i padimatea, o i uka ma i masia i voro a kedo i padimatea, a naro mu gu ratea ge maea. E huriki na vaponga ri gi ramai a vinara, ri gi pelekado kamumu a viri i padimate ruru a viri, turana a viri i ngaru ni koli a matenga. 25A bakovi i rabalaki a viri, e huriki na vaponga ri gi korimulea na limana viri koli, ri gi rudu mulea ge made na tanga ni kapiloho. Ge made kapiloho vonga ge harena na tahuna a prister dagi ge mate, ra prister ni biri na nibiri ni gamai.
26“Pali na tahuna a prister dagi i uka ma i mate ma, ra bakovi i rabalaki a viri ge ha taro a tanga ni kapiloho, ge page tala, 27lakea a viri i koli ge masia, ge rabalakia, bara i uka ngava. 28A vuhuna a bakovi i rabalaki a viri nahea ge ha taroa a tanga ni kapiloho, ge harena na tahuna a prister dagi ge mate. Na tahuna a prister dagi i mate, bara i hamule lakea na tanga vona.
29“Mua turane huriki a hamone mua, na tahuna mu made na hini vai, mu ramaia a vinara iea.
30 b“Na tahuna ni rata a ngavana ra bakovi i rabalaki a viri, pali bara a viri i ala rua o ala tolu to masia, to rata a ngava i palupulupu, mu rabalakia ra bakovi iea. Pali bara a bakovi i ala taku kunana i masia, nahea ni gi rabalaki.
31“A bakovi i rabalaki a viri, nahea ni gi kona mule ia na moni, ni gi rabalaki kunana. 32A bakovi i rabalaki a viri, i ha, i kapiloho na tanga ni kapiloho, nahea mu gu bole a moni vona, ge konea a dalana ge hamule mai a tanga vona, na tahuna i uka ma i mate ma a prister dagi.
33“Naha ni vakamuto a malala, ra mu made vona. A malala bara i muto na tahuna a dara i tua langa vona. A dala i taku kunana bara mu kavitagu a malala i tua vona a dara, i maea: ge tua a dara na viri i rabalaki a viri. 34Naha ni ratea a malala mu made vona ge muto, a vuhuna iau, e BAKOVI DAGI, a made turane mua e huriki a Israel.”
Copyright information for
BNP